काठमाडौं। सुन तस्करीको आरोपमा पक्राउ परेको निवर्तमान राष्ट्रपति नन्द बहादुर पुनका सल्लाहकार जीवन कुमार गुरुङलाई प्रहरीले त्रिभुवन विमानस्थल भन्सार कार्यालयमा बुझाएको छ ।
त्रिभुवन अन्तर्राष्ट्रिय विमानस्थलबाट भएको १४ किलो सुन तस्करी प्रकरणमा गुरुङ संलग्न रहेको भन्दै क्लिकमाण्डुले गत पुस १७ गते समाचार प्रकाशित गरेको थियो ।
प्लाटिनम कलेजका कार्यकारी अध्यक्ष समेत रहेका गुरुङको योजनामा सुन तस्करी हुने गरेका भन्सार विभागका अधिकारीले जानकारी दिएका थिए ।
भन्सार कार्यालयले गत पुस ६ गते जिल्ला अदालतबाट पक्राउ पुर्जी जारी गराएर गुरुङलाई पक्राउ गर्न आग्रह गर्दै प्रहरीलाई पत्राचार गरे पनि २ महिनासम्म गुरुङलाई प्रहरीले पक्राउ गर्न सकेको थिएन । नेपाल प्रहरीका तत्कालीन महानिरीक्षक हेमबहादुर गुरुङसँगको निकटताले प्रहरीले गुरुङलाई नियन्त्रणमा लिन समय लगाएको स्रोतको दाबी छ ।
पर्वत स्थायी घर भएका जीवन गुरुङलाई सोमबार केन्द्रीय अनुसन्धान ब्युरो (सीआईबी) ले काठमाडौंको सामाखुसी क्षेत्रबाट पक्राउ गरेको थियो ।
गत मंसिर २१ गते फ्लाइ दुबईबाट काठमाडौं आएका चन्द्र घलेबाट बरामद भएको १४ किलो सुन तस्करीमा गुरुङ संलग्न रहेको भन्दै भन्सार कार्यालयले थप अनुसन्धानका लागि गुरुङलाई नियन्त्रणमा लिन खोजेको थियो । विमानस्थल भन्सार कार्यालयको पत्रका आधारमा गुरुङलाई पक्राउ गरिएकाले प्रहरीले सोमबार बेलुका गुरुङलाई भन्सार कार्यालयमा बुझाएको छ ।
विमानस्थल भन्सार कार्यालयका एक उपसचिवका अनुसार मंगलबार गुरुङलाई थुनामा राख्न जिल्ला अदालतबाट अनुमति लिइने र गुरुङलाई लागेका आरोपका विषयमा विस्तृत अनुसन्धान गर्ने तयारी गरिएको छ ।
१४ केजी सुनसहित रंगेहात पक्राउ परेको चन्द्र घलेको बयानका आधारमा भन्सार कार्यालयले मीन घलेलाई पक्राउ गरेको थियो । मीन घलेले गुरुङको आदेशमा आफूले काम गरेको बयान दिएका थिए । गुरुङ घले पक्राउ परे लगत्तै फरार भएका थिए ।
मीन घलेले बयानमा क्रममा जीवन गुरुङ पूर्व उपराष्ट्रपति पुनको सल्लाहकार भइसकेको र गुरुङले नै काठमाडौंमा जम्मा हुने सुन सीमावर्ती क्षेत्रमा पुर्याउने गरेको बताएका छन् ।
भन्सार विभागका अधिकारीहरू नेपालबाट हुने गरेका ठुला सबै सुन तस्करीको घटनामा गुरुङ योजनाकार रहेको दाबी गर्छन् ।
‘दुबई र हङकङमा सुन खोज्ने, सुन ल्याउने भरिया खोज्ने, नेपालमा आएको सुन भारततर्फ पुर्याउने र पैसाको कारोबार मिलाउनेमा गुरुङ संलग्न भएको प्रमाण हामीसँग छ,’ विभागका एक अधिकारी भन्छन्,’ब्रेक सु भन्दै सुन ल्याएको प्रकरणमा पनि गुरुङ संलग्न भएको प्रमाण भेटिएका छन् । उच्च राजनीतिक पहुँचको आडमा प्रशासन मिलाएर सुन तस्करीको धन्दा गुरुङले चलाउने गरेको कयौँ प्रमाण भेटिएका छन् ।’
गुरुङ पक्राउ नपरेपछि भन्सार कार्यालयले पूरक अनुसन्धान गर्ने गरी चन्द्र घले र मीनबहादुर घलेसहितका प्रतिवादीसँग १ अर्ब ४० करोड ५५ लाख रुपैयाँ बिगो माग गर्दै काठमाडौं जिल्ला अदालतमा मुद्दा दायर गरेको थियो ।
सरकारी वकिल कार्यालयले १४ केजी सुन तस्करी प्रकरणमा पूरक अनुसन्धान गर्न अनुमति दिएकाले आगामी २४ दिन भित्र गुरुङ विरुद्ध अनुसन्धान सम्पन्न गर्दै मुद्दा दायर गरिने भन्सार कार्यालयले जानकारी दिएको छ ।
SHARE YOUR THOUGHTS