विराटनगर । राष्ट्रिय गौरवको योजना अन्तर्गत विराटनगर १९ बैजनाथपुरमा निर्माण हुने भनिएको सुविधा सम्पन्न गिरिजाप्रसाद कोइराला अन्तर्राष्ट्रिय क्रिकेट रंगशाला निर्माणका लागि राष्ट्रिय खेलकुद परिषद (राखेप) ले प्रक्रिया सुरु गरेको छ ।
राखेपले वातावरणीय प्रभाव मूल्यांकनको फाइल मन्त्रालयमा पेस गरिसकेको छ । राखेप निर्माण विभाग प्रमुख इन्जिनियर राजु श्रेष्ठले क्लिकमान्डुसँग भने, ‘वातावरण मन्त्रालयबाट इआईए स्वीकृत भएलगत्तै निर्माण प्रक्रियाले गति लिने छ ।’
राखेपले योजना आयोग र अर्थमन्त्रालय समक्ष वहुवर्षीय आयोजना बनाउँदै बजेट माग गरेको हो।
वातावरण मन्त्रालयलबाट इआईए स्वीकृत हुने बित्तिकै फाइल योजना आयोग र अर्थमन्त्रालय पुग्ने छ । श्रेष्ठले भने, ‘आयोग र अर्थमन्त्रालयको निर्देशनपछि टेण्डर आह्वानको प्रक्रिया सुरु हुन्छ।’
दुई मन्त्रालय र योजना आयोगबाट फाइल अघि बढेपछि रंगशाला निर्माणको कामले गति लिने उनी बताउँछन् ।
यसअघि संघीय संसदको समितिले दुई क्रिकेट रंगशालाका लागि स्रोत सुनिश्चितता गर्न अर्थमन्त्रालयलाई निर्देशन दिएको थियो ।
संघीयता सबलीकरण तथा राष्ट्रिय सरोकार समितिले मूलपानी क्रिकेट ग्राउण्ड, गिरिजाप्रसाद क्रिकेट ग्राउण्ड निर्माणको लागि स्रोत सुनिश्चितता गर्न अर्थ मन्त्रालयलाई निर्देशन दिएको हो ।
समितिले वातावरणीय प्रभाव मूल्यांकन (इआईए) गर्ने काम छिटो टुंग्याउन वन तथा वातावरण मन्त्रालयललाई निर्देशनसमेत दिएको छ ।
सरकारले यो रंगशालालाई राष्ट्रिय गौरवको योजनामा राखेर २ अर्ब ७९ करोड ७४ लाखको लागतमा तीन वर्षभित्रमा अन्तर्राष्ट्रिय स्तरको क्रिकेट रंगशालासहित बहुउद्देश्यीय कभर्डहल, स्विमिङहल, चेन्जिङ ब्लक, पेभिलियन र प्याराफिट निर्माण गर्ने तयारी गरेको हो ।
राखेप स्रोतकाअनुसार सरकारले यो योजनाका नाममा चालु आर्थिक वर्षमा एक करोड रुपैयाँ मात्र बजेट विनियोजन गरेको छ ।
‘राष्ट्रिय गौरवको योजनामा राख्ने तर बजेट चाहीँ १ करोड रुपैयाँ मात्र छुट्याउने काम भएको छ । यो योजनाका नाममा झारा टार्ने काम हो ।’
त्यसैगरी अर्को राष्ट्रिय गौरवको योजना काठमाडौंस्थित मूलपानी क्रिकेट रंगशालाका लागि ५० करोड विनियोजन भएको छ ।सरकारले ठाउँ र योजनाका नाममा भेदभाव गरेर काम गर्नै अप्ठ्यारो पारेको उनको भनाइ छ ।
कूल लागतको कम्तिमा पनि २५/३० प्रतिशतसम्म बजेट विनियोजन नभए निमार्ण प्रक्रिया सुरु गर्न गाह्रो हुने स्रोतको भनाइ छ ।
राखेपले यो योजनाको डीपीआर तयार गर्न मात्र झण्डै एक करोड खर्च गरेको थियो ।
समुन्द्र सतहबाट ९२ मिटर उचाइमा रहेको कोशी प्रदेशको राजधानी तथा औद्योगिक नगरलेसमेत चिनिने विराटनगरको बैजनाथपुरको १५ विघा क्षेत्रफलमा निर्माण हुने १० हजार सिट क्षमताको अन्तर्राष्ट्रिय क्रिकेट रंगशाला निर्माणको स्रोत सुनिश्चितता गर्न संघीयता सबलीकरण तथा राष्ट्रिय सरोकार समितिले अर्थमन्त्रालयलाई निर्देशन समेत दिसकेको छ ।
यो मैदानमा क्रिकेट रंगशालासहित ५ हजार सिट क्षमताको एथलेट्क्सि ट्रयाक, फुटबल कम रग्बी रंगशाला, प्याभेलियन, वहुउपयोगी कभर्डहल, गार्ड हाउस, टिकट काउन्टर, अभ्यास नेट, स्विमिङपुल, खेलाडी ब्लक, पार्किङ क्षेत्र, होस्टल ब्लक र रेष्टुरेन्ट पनि निर्माण हुने छ ।
गिरिजाप्रसाद कोइरालाकै सक्रियतामा बहुउद्देश्यीय रंगशाला बनाउने भन्दै वन आपूर्ति समितिको साढे ८१ लाख रुपैयाँले २०५७ सालमा १५ विघा १५ धुर जमिन खरिद गरिएको तत्कालीन क्षेत्रीय खेलकुद विकास समितिका अध्यक्ष सुधर अर्यालले जानकारी दिए ।
यो मैदान यहाँको सहिद मैदानदेखि ५ किलोमिटर उत्तरपूर्वमा पर्छ। अर्यालले भने,’यो जमिनमा आफ्नो नामको बहुउद्देश्यीय रंगशाला बनाउने धोको गिर्जाबाबुको थियो । उनकाअनुसार त्यसबेला यो जमिन प्रतिविघा ५ लाख ४१ हजार रुपैयाँका दरले खरिद गरिएको थियो ।
यही मैदानमा राखेपले सातौं राष्ट्रिय खेलकुद प्रतियोगितामा पुरुष क्रिकेट प्रतियोगिता सञ्चालन गरेको थियो । त्यसका लागि राष्ट्रिय खेलकुद परिषद्ले ६० लाख रुपैयाँको लागतमा (टर्फ विकेट) क्रिकेटको घाँसे मैदान तयार गरेको थियो । त्यस्तै सातौं राष्ट्रिय खेलकुद प्रतियोगिताकै लागि ४० लाखको लागतमा सुटिङ भवन र रेन्ज तथा १६ लाखको लागतमा सफ्ट टेनिस कोर्टको निमाण गरेर प्रतियोगिता सञ्चालन गरिएको थियो । सुटिङ भवन र रेन्ज र सफ्ट टेनिस कोर्ट यसबेला वेवारिसे अवस्थामा छ ।
त्यसयता यो रंगशालाको क्रिकेट पीचमा अहिलेसम्म राखेप र प्रदेश सरकारको गरेर तीन करोड रुपैयाँ भन्दा बढी रकम खर्च भइसकेको क्रिकेट संघ मोरङका अध्यक्ष महमद साद वावुको भनाइ छ । यो मैदानमा तीनवटा टर्फ विकेट छन् । साइड स्क्रिनको व्यवस्था छ । मैदान राम्रो छ र चारैतर्फ घेराबारा गरिएको छ ।
अहिले पनि यो मैदानमा प्रदेश र राष्ट्रियस्तरका क्रिकेट म्याच भइरहेका छन् । वावुले भने, ‘तर पेभिलियन,प्याराफिट र वाथरुमको व्यवस्था नहुँदा सबैपक्षले समस्या भोग्दै आएको छ ।’
प्रतिक्रिया