बैंकभन्दा बीमालेख धितोमा कर्जाको ब्याजदर सस्तो, ३५ अर्ब ५६ करोड रुपैयाँ कर्जा

काठमाडौं । सञ्चालनमा रहेका जीवन बीमा कम्पनीहरुले चालु आर्थिक वर्षको पहिलो त्रैमासमा ३५ अर्ब ५६ करोड २४ लाख २३ हजार ४२ रुपैयाँ बीमा लेखको धितोमा कर्जा दिएका छन् ।

यो कर्जा गत आर्थिक वर्षको सोही अवधिको तुलनामा ५३.८९ प्रतिशतले बढी हो । गत आवको पहिलो त्रैमासमा बीमा कम्पनीहरुले २३ अर्ब १० करोड ८० लाख ८१ हजार ९१ रुपैयाँ धितोमा कर्जा दिएका थिए ।

गत आवको सोही अवधिमा १२ वटा जीवन बीमा कम्पनीले मात्रै कर्जा दिएका थिए । चालु आवमा जीवन बीमा कम्पनीहरु थपिएका छन् ।

गत वर्ष बीमालेखको धितोमा कर्जा नदिएका तर यो आवको पहिलो त्रैमासमा थप ५ वटा जीवन बीमा कम्पनीले कर्जा दिन थालेका छन् ।

१९ वटा जीवन बीमा कम्पनीमध्ये मेट लाइफ र प्रभु लाइफ इन्स्योरेन्सले भने बीमा लेखको धितोमा कर्जा दिएका छैनन् । अन्य जीवन बीमा कम्पनीको यस्तो धितोकर्जा निकै बढेको छ ।

बीमा लेखको धितोमा कर्जा ९.७० देखि ४ हजार २०२ प्रतिशतसम्म बढेको छ । यसर्थ पनि जीवन बीमा कम्पनीले बीमालेख धितोमा दिने कर्जालाई प्राथमिकतामा राखेको देखिएको छ ।

चालु आवको पहिलो त्रैमाससम्मको तथ्यांकलाई हेर्दा सबैभन्दा बढी कर्जा लगानी नेपाल लाइफ इन्स्योरेन्सको छ । नेपाल लाइफले १४ अर्ब ६६ करोड २८ लाख ८१ हजार ३४९ रुपैयाँ कर्जा लगानी गरेको छ ।

जुन गत आवको सोही अवधिको तुलनामा ५४.९७ प्रतिशतले बढी हो । त्यस्तै सनलाइफको बीमालेखको धितोमा कर्जा ४ हजार २०२.८६ प्रतिशतले बढेको छ । गत आवको पहिलो त्रैमासमा २२ लाख ६७ हजार रुपैयाँ कर्जा दिएको इन्स्योरेन्सले चालु आवको सोही अवधिमा ९ करोड ७५ लाख ४६ हजार रुपैयाँ दिएको छ ।
यस्तै सिटिजन्स लाइफ इन्स्योरेन्सको पनि धितोकर्जा १ हजार ४९३.९१ प्रतिशतले बढेको छ । यता आईएमई लाइफले ४९८.१४, यूनियन लाइफको कर्जा ४३७.०२ प्रतिशतले बढेको छ ।

पछिल्लो समयमा बीमालेखको धितोमा कर्जा लिनेको संख्या बढ्दै गएको छ । सुर्या लाइफ इन्स्योरेन्सका प्रमुख कार्यकारी अधिकृत (सिइओ) शिवनाथ पाण्डे बैंकबाट कर्जा लिँदा सेवा शुल्क तिर्नुपर्ने, ब्याजदर पनि फरक फरक हुने भएकोले बीमालेख धितोमा कर्जा लिनेको आकर्षण बढेको बताउँछन् ।

‘बीमा गरेको २ वर्षका ऋण लिनको लागि बीमा गर्ने व्यक्ति २ वर्षमा परिपक्व हुन्छ । उसले तिरेको प्रिमीयमबाट सरेन्डर भ्यालु निकालिन्छ र सरेन्डर भ्यालुको ९० प्रतिशत ऋण दिइन्छ’ पाण्डेले भने ।

ऋण दिँदा ब्याजदर भने बीमा कम्पनी अनुसार फरक हुने उनको भनाई छ । सिइओ पाण्डेले भने ‘हामी १० प्रतिशत ब्याजमा ऋण दिन्छौंं, त्यसमा सेवाशुल्क लाग्दैन । त्यो उहाँहरु कै पैसा हो । यो भनेको सेवा हो ।’ बैंकमा भन्दा ऋण लिन सजिलो हुने भएर बीमालेख धितोमा कर्जा लिनेको संख्या बढेको पाण्डेको भनाई छ ।
अहिले बीमा कम्पनीहरुको प्रिमियम बढेको र सोहि अनुसार बीमालेख धितोमा कर्जा लिने क्रम पनि बढेको उनले बताए ।