वैदेशिक रोजगारीमा जानेको परिवारको स्वास्थ्य बीमा कार्यक्रम कार्यान्वयनमा आएन

काठमाडौँ । स्वास्थ्य बीमा बोर्डले वैदेशिक रोजगारमा जानेले परिवारको स्वास्थ्य बीमा अनिवार्य गर्नुपर्ने योजना अघि सारेको थियो । बोर्डले सो सम्बन्धि कार्यविधि समेत बनाइसेको छ ।

बोर्डले मंसिर महिनादेखि वैदेशिक रोजगारमा जाने व्यक्तिले आफ्नो परिवारको बीमा नगरि रोजगारीका लागि जान नपाउने नियम लागू गर्न खोजेको थियो ।
तर, मंसिर महिना वित्न लाग्दा पनि उक्त कार्यविधि कार्यान्वयनमा आउन भने सकेको छैन ।

कार्यविधि बनाएर वैदेशिक रोजगार विभागका सचिवसँग छलफल भएको तर सचिवको सरुवा भएको कारणले उक्त कार्यविधि कार्यान्वयनमा ल्याउन नसकेको बोर्डले जानकारी दिएको छ ।

बोर्डका सूचना अधिकारी सोभित रिजाजले वैदेशिक रोजगार विभागमा आएका नयाँ सचिवसँग सो कार्यविधिका बारेमा छलफल समेत भइसकेको जानकारी दिए ।

कार्यविधिअनुसार वैदेशिक रोजगारीमा जाने कामदारका परिवार अनिवार्य रूपमा स्वास्थ्य बीमामा आबद्ध हुनुपर्नेछ । कामदारले श्रम स्वीकृति लिने समयमा नै स्वास्थ्य बीमामा आबद्ध भएको प्रमाण पेस गर्नुपर्नेछ ।

कार्यान्वयनमा आएन मोबाइल एप्लिकेसन एप

बीमा कार्यक्रमलाई सहज र पारदर्शी बनाउनका लागि भन्दै स्वास्थ्य बीमा बोर्डले प्रविधिसँग जोडिदै अघि बढ्ने प्रतिवद्धता गर्दै आए पनि प्रविधिसँग नजिक हुन भने सकेको छैन ।

मंसिर महीनादेखि बोर्डले स्वास्थ्य बीमा सेवाको बारेमा आफ्नै एपमार्फत सबै खाले जानकारी दिने गरी काम अघि बढाए पनि कार्यान्वयनमा भने ल्याउन नसकेको हो ।

बोर्डले असोज महिनामै उक्त एप्लिकेसन निमार्णको काम अन्तिम चरणमा पुगेको बताएको थियो । बोर्डले सो एप्लिकेसनलाई मंसिर महीनादेखि प्रयोगमा ल्याउने जनाएको थियो । तर, अझै पनि बोर्डले उक्त एप्लिकेसनलाई कार्यान्वयनमा ल्याउन सकेको छैन ।

बोर्डका अनुसार एप्लिकेसनमार्फत हरेक नागरिकले आफ्नो बीमा रकम कहाँ, कसरी प्रयोग भइरहेकोबारे जानकारी लिन सक्नेछन् । सफ्टवेयरमार्फत आगामी दिनमा मानिसहरूले आफैँ स्वास्थ्य बीमामा आबद्ध हुन सक्नेछन् ।

७६ जिल्ला पुग्यो स्वास्थ्य बीमा

सरकारले सञ्चालनमा ल्याएको स्वास्थ्य बीमा कार्यक्रम देशका ७६ जिल्लामा विस्तार भएको छ । हालै मात्रै ललितपुर जिल्लामा उक्त कार्यक्रम विस्तार गरिएको स्वास्थ्य बीमा बोर्डले जानकारी दिएको छ ।

बोर्डका सूचना अधिकारी रिजालले ललितपुरका तीन वटा स्थानीय तहमा कार्यक्रम शुचारु भइसेकेको जानकारी दिए ।

२०७२ सालमा शुरु गरिएको स्वास्थ्य बीमा कार्यक्रम देशका ७६ जिल्लामा विस्तार भएको छ । बाँकी रहेको एक जिल्ला काठमडौँमा समेत कार्यक्रम विस्तार गर्ने प्रक्रिया अन्तिम चरणमा पुगेको उनले जानकारी दिए ।

बोर्डले काठमाडौँ जिल्लामा सेवा विस्तार गर्नका लागि स्थानीय तहसँग समन्वयन समेत गरिसकेको छ । कार्यक्रमका लागि दर्ता सहयोगी छनौटको प्रक्रिया समेत सम्पन्न गरेको बोर्डको भनाइ छ ।

सम्पूर्ण जनताले सहज रूपमा स्वास्थ्य उपचार पाउनु पर्ने अधिकारलाई सुनिश्चित गर्दै सरकारले स्वास्थ्य बीमाको कार्यक्रम ल्याएको हो ।

कुनै पनि नागरिकलाई सामान्य रोगदेखि मुटु, मृगौला, क्यान्सर लगायतका कडा रोग तथा अन्य उपचारमा सहायता होस् भन्ने उद्देश्यका साथ सरकारले स्वास्थ्य बीमा कार्यक्रम सञ्चालनमा ल्याएको हो ।

सरकारले ल्याएको यस कार्यक्रमा सबै उमेर समुहका व्यक्ति सहभागी हुन पाउने व्यवस्था छ ।

कार्यक्रममा आवद्ध हुन चाहने पाँच जनासम्मको परिवारले बीमाशुल्कवापत प्रति परिवार प्रत्येक वर्ष ३ हजार ५ सय रुपैयाँका दरले शुल्क बुझाउनु पर्ने हुन्छ ।

सरकारले अति गरिब, विपन्न,गरीबीको रेखा मुनि रहेका नागरिकलाई बीमाशुल्कमा अनुदानको समेत व्यवस्था गरेको छ । अति विपन्न नागरिकलाई शत प्रतिशत, विपन्नलाई ७५ प्रतिशत तथा गरीबीको रेखा मुनि रहेका नागरिकलाई ५० प्रतिशतका दरले बीमाशुल्कबापतको रकम सरकार आफैले तिरिदिने व्यवस्था छ ।