काठमाडौं । अमलेखगन्जदेखि चितवनको लोथरसम्म पेट्रोलियम पाइपलाइन विस्तारको शिलान्यास भएको छ । भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ र भारतका प्रधानमन्त्री नरेन्द्र मोदीले संयुक्त रुपमा पाइपलाइन विस्तारको शिलान्यास गरेका हुन् ।

नेपाल आयल निगमले यसअघि नै अमलेखगन्ज-लोथर पेट्रोलियम पाइपलाइनको सम्भाव्यता अध्ययन सकिएर पहिलो चरणको काम गरिरहेको छ । डीपीआर तयार गर्ने काम भइरहेको छ । लोथरमा १ लाख किलोलिटर पट्रोलियम पदार्थ भण्डारण क्षमताको निर्माण गरिँदै छ ।

भारतको मोतीहारीबाट अमलेखगन्जसम्म सञ्चालित पेट्रोलियम पाइपलाइनलाई चिवतनको लोथरसम्म विस्तार गरिने भएको हो । करिब ६५ किलोमिटर पाइपलाइन विस्तारका लागि सरकारले आर्थिक वर्ष २०७७/७८ मा बजेट विनियोजन गरेको थियो ।

मोतीहारी-अमलेखगन्ज पेट्रोलियम पाइपलाइन सम्पन्न गरेपछि चितवनको लोथरसम्म विस्तार गर्न नेपाल र भारतबीच समझदारी भएको हो । पेट्रोलियम पदार्थको भण्डारण क्षमतालाई वृद्धि गरी ९० दिनसम्म पुग्ने भण्डारण बनाउन नेपाल आयल निगमले भण्डारण स्थलहरूको निर्माण गर्नेछ ।