ललिता निवास प्रकरण: पक्राउ परेका ४ जनालाई म्याद थपका लागि अदालत लगियो

काठमाडौं । बालुवाटारस्थित ललिता निवास प्रकरणमा पक्राउ परेका चार जनालाई समय थपका लागि अदालत लगिएको छ ।

केन्द्रीय अनुसन्धान ब्युरोले मंगलबार पक्राउ परेका ४ जनालाई म्याद थपका लागि जिल्ला अदालत काठमाडौं लगिएको छ । केन्द्रीय अनुसन्धान ब्युरोले बुधबार ललिता निवास प्रकरणबारे जानकारी दिन पत्रकार सम्मेलन गरेसँगै उनीहरुलाई अदालत तर्फ लगिएको छ ।

प्रहरीले पूर्वनिर्वाचन आयुक्त सुधीर शाह, भाटभटेनी सुपरमार्केटका सञ्चालक मीनबहादुर गुरुङ एवं तत्कालीन सरकारी कर्मचारी गोपाल कार्की र धर्मप्रसाद गौतमलाई पक्राउ गरेको छ ।

बालुवाटारस्थित ललिता निवास रहेको १४३ रोपनी सरकारी जग्गा विभिन्न सरकारी कर्मचारीदेखि नेता र व्यापारीले हत्याइएको पाइएको प्रहरीले जनाएको छ ।

केन्द्रीय अनुसन्धान ब्युरोले बुधबार पत्रकार सम्मेलन गरी पहिलो चरणमा ११२ रोपनी र दोस्रो चरणमा ३१ रोपनी जग्गा व्यक्तिको नाममा नामसारी भएको जानकारी गराएको हो ।