काठमाडौं । नेपाल उद्योग परिसंघका अध्यक्ष राजेश अग्रवालले देशमा उद्योग खोल्नु अपराध हो भन्दै प्रश्न गरेका छन् ।
उद्योग खोल्छु, रोजगारी सृजना गर्छु, राज्यलाई कर तिर्छुभन्दा राज्यले अपराधी जस्तो व्यवहार गरेको उनको भनाइ छ ।
आइतबार डेडिकेटेड ट्रंक लाइनको विवादका विषयमा उद्योगीहरुले आयोजना गरेको पत्रकार सम्मेलनमा अध्यक्ष अग्रवालले अहिले नेपालमा ६१ उद्योगले अपराध गरेको जस्तो प्रमाणित गर्न खोजिएको भन्दै असन्तुष्टि पोखे ।
‘नेपालमा नै बसौ, उद्योग खोलौ, रोजगारी सृजना गरौ, राज्यलाई कर तिरौं भने त्यो वातावरण नै छैन’ उनले भने ‘अहिले नेपालमा ६१ उद्योगले अपराध गरेको जस्तो प्रमाणित गर्न खोजिएको छ । राज्यलाई कर तिरौं भन्दा त्यो अधिकार उद्योगीलाई छैन भन्न खोजिँदैछ । त्यो अधिकार राजनीतिज्ञ वा कर्मचारीलाई मात्रै भएको जस्तो देखिएको छ । के यो देशमा उद्योग खोल्नु अपराध हो।’
हरेक संस्थामा उद्योगीहरुलाई अपराधीजस्तो व्यवहार गरिएको उनको दुखेसो छ ।
‘३५ वर्षअघि उद्योग लगाउनु अघि एक जनाले मलाई यो देशमा उद्योग लगाउनु अपराध हो भनेका थिए तर पनि उद्योग लगाएँ,’ उनले भने, ‘तर हरेक संस्थामा हामीलाई अपराधी जस्तो व्यवहार गर्छन् ।’
SHARE YOUR THOUGHTS