सेयर बजार तत्काल नसुध्रिए आमरण अनसन बस्ने लगानीकर्ताको चेतावनी, यस्ता छन् १० बुँदे माग

काठमाडौं । सेयर बजार लगातार घटेपछि लगानीकर्ताहरु चिन्तित बन्न थालेका छन् । सेयर बजारका सुधारका लागि संघर्ष गर्दै आएका लगानीकर्ताहरुले अब पनि बजारमा सुधार नआए आमरण अनसन बस्ने चेतावनीसमेत दिएका छन् ।

बजार घटेर छटपटाएका लगानीकर्ताहरु कहिले नेप्से त कहिले धितोपत्र बोर्ड घेराउ गर्न थालेका छन् । केहीसमय अघि मात्रै नेप्से घेराउ गरेका लगानीकर्ताहरुको समूहले आज नियामक निकाय धितोपत्र बोर्ड घेराउ गरेको छ ।

धितोपत्र बोर्डसमक्ष १० बुँदे मागपत्र बुझाउँदै तत्काल बजार सुधारका लागि बोर्डले ठोस कदम नचाले र आफूहरुका माग सम्बोधन नगरे आमरण अनशनमा उत्रिने चेतावनी दिएको छ ।

सेयर लगानीकर्ता दबाब समूहले सेयर बजारको सुधार र बिस्तारका लागि दबाब सिर्जना गर्न धितोपत्र बोर्ड घेराउ गर्नुपरेको जनाएको छ ।

पूँजी बजारमा हुनुपर्ने सुधार तथा बजार बिस्तारका कामहरु समयमै नहुँदा त्यसको गंभीर असर पर्न गई आम लगानीकर्ताले धान्नै नसक्ने क्षति ब्यहोरेको समूहको निष्कर्श छ ।

सेयर लगानीकर्ता दबाब समूहले के के माग्यो ?

१, सरकारले पूँजी बजारसम्बन्धी आफ्नो धारणा तथा नीति स्पष्ट गरोस र बजार सुधार तथा बिस्तारका लागि तत्काल बिशेष कार्यक्रम ल्याओस् ।

२, अनलाईन कारोबार प्रणालीको पहुँच तत्काल आम लगानीकर्तामा पुर्याईओस् ।

३, धितोपत्र बोर्डले तीन बर्ष अघिदेखि गैर आवासीय नेपाली र विदेशमा बस्ने नेपालीलाई पूँजी बजारमा ल्याउन कार्यविधि बन्दै गरेको भन्दै आएकोमा तत्काल सो कार्यविधि लागु गरी उनीहरुलाई पूँजी बजारमा भित्र्याईयोस् ।

४, शेयर दलाल मार्फत मार्जिन ट्रेडिङ तत्काल खुला गरियोस् ।

५, शेयर धितो कर्जाको सिमा धितो मूल्यांकनको ८० प्रतिशत पुर्याईयोस र जोखिम भारित अंश १०० प्रतिशत वा सो भन्दा कम कायम गरी सस्तो ब्याजमा कर्जा प्राप्त हुने ब्यवस्था गरियोस् । प्राथमिक पूँजीको २५ प्रतिशतसम्म हैन, कुल कर्जा लगानीको २५ प्रतिशत रकम बैंक तथा बित्तीय संस्थाले शेयर धितो कर्जा प्रबाह गर्नसक्ने ब्यवस्था होस् ।

६, धितोपत्र बोर्डले तीन बर्षदेखि भन्दै आएको मार्केट मेकर र डिलरशीपको तत्काल ब्यवस्था होस् ।
७, ग्रेड चार र पाँच रेटिड। प्राप्त गरेका कम्पनीहरुलाई आईपीओ बिक्री गर्न तत्काल बन्देज लगाई जलबिद्युत र अन्य कम्पनीहरुलाई प्रत्यक्ष नियमनकारी निकायको ब्यवस्था भएपछि मात्र आईपीओ ल्याउन पाउने ब्यवस्था गरियोस् ।

८, कम्पनीले हकप्रद शेयर बिक्रीको प्रस्ताब सार्वजनिक गर्नु अगाबै संस्थापक र आधारभुत शेयरधनीहरुले प्रस्तावित हकप्रदको ७५ प्रतिशत रकम जम्मा गरेपछि मात्र प्रस्ताब सार्वजनिक गर्न र साधारणसभामा पेश गर्न पाउने ब्यवस्था गरियोस् ।

९, सहायक कम्पनी खोलेर आबेदन गरेका बाणिज्य बैंकलाई तत्काल ब्रोकर लाईसेन्स दिनुका साथै देशका सबै जिल्ला समेट्ने गरी नयाँ शेयर दलालहरुलाई तत्काल ब्रोकर लाईसेन्स दिएर पूँजी बजारमा देशभरिका जनताको पहुँच कायम हुने ब्यवस्था गरियोस् ।

१०, कम्पनीहरुले एफपीओ बिक्रीको प्रस्ताब गर्दा प्रति शेयर नेटवर्थ भन्दा मूल्य बढी नहुने शर्तमा मात्र स्वीकृत गरियोस् ।