विराटनगर । कोशी प्रदेश कांग्रेसमा संस्थापन पक्ष र इतरपक्ष बीचको गुटगत किचलो गहिरो बन्दै गएको छ । संस्थापन र इतरपक्षले फरक फरक भेला आयोजना गरेकोले प्रदेशमा गुटगत किचलो थप गहिरो भएको हो । इतरपक्षले मंगलवार विराटनगरमा आयोजना गर्न लागेको प्रदेश स्तरीय पालिका सभापतिहरुको भेलाले पुष्टि गरेको छ, भने सस्थापन पक्षले २२ गते विराटनगरमा प्रदेशस्तरीय सम्मेलनको आयोजना गर्ने तयारी गरेको छ ।
मंगलवारको भेलाको प्रमुख अतिथि शेखर कोइराला हुने भने, २२ गतेको भेलामा सभापति शेरबहादुर देउवा प्रमुख अतिथि हुने प्रचार गरिएको छ । यसबीच, कोइराला समूहको भेलालाई रोक्न पार्टीको केन्द्रीय कार्यालयले पत्राचार गरेको छ ।
केन्द्रीय पार्टी कार्यालयका मुख्य सचिव कृष्णप्रसाद पौडेलद्वारा हस्ताक्षरित पत्रमा कांग्रेसको वैधानिक प्रावधानअनुसार, प्रत्येक तहको सम्मेलनको प्रक्रिया विशेष तहको कार्यसमितिले आयोजना गर्ने र समन्वय गर्ने व्यवस्था रहेको उल्लेख गरिएको छ ।
यसरी, मंसिर २२ गतेको कार्यक्रम प्रदेश समितिको आयोजनामा निर्धारित गरिएको उल्लेख गर्दै, उक्त मितिभन्दा पूर्व कुनै कार्यक्रम आयोजना नगर्न पत्रमा भनिएको छ । यद्यपि, कोइराला निकट कांग्रेस विराटनगर महानगर सभापति दिपक चापागाँई केन्द्रीय कार्यालयबाट कार्यक्रम नगर्न नभनिए बताउँछन् । निर्धारित कार्यक्रम असहमतिका बाबजुद पनि जारी राख्ने उनले बताए।
सस्थापन पक्षले २२ गतेको भेलामा क्षेत्रीय सभापतिहरु, महासमिति सदस्य, महाधिवेशन प्रतिनिधि, पालिका सभापति, प्रतिनिधि सभा सदस्य र प्रदेश अधिवेशन प्रतिनिधिहरु सहभागी हुने र सम्मेलनको बन्द सत्रमा प्रदेश कांग्रेसको सांगठानीक, राजनीतिक र आर्थिक प्रतिवेदनमाथि छलफल गर्ने जनाएको छ ।
कोइराला समूहको भेलामा भने पार्टीको संगठन र विधानमाथि छलफल हुने बताइएको छ ।
कोशी प्रदेश कांग्रेसका सभापति झापाका उद्धव थापा हुन् । उनी नेता कृष्णप्रसाद सिटौला निकट मानिन्छन् । सिटौला सभापति शेरबहादुर देउवा पक्षमा रहेकोले, देउवा र सिटौलाको गठबन्धनले गत प्रदेश महाधिवेशनमा कोइराला समूहका गुरुराज घिमिरेलाई २ मतले हराएका थिए ।
कोशी प्रदेशमा देउवा, सिटौला र कोइराला समूह बीचको किचलो गहिरो बनेको हो । आइतवार सम्पन्न मोरङको ग्रामथान गाउँपालिकाको प्रमुख पदको उपनिर्वाचनमा कांग्रेसको पराजयलाई पनि गुटगत संघर्षसँग हेरिएको कांग्रेसका स्थानीय नेताहरु बताउँछन् ।
ग्रामथान उपनिर्वाचनको पराजयका बीच, कांग्रेसका तीनवटा गुटका नेता र कार्यकर्ताहरुको चुनावी प्रचारमा भिन्नभिन्न रवाफ देखिएको थियो । चुनावी सरगर्मी चलिरहेका बेला, कोइराला निकट उम्मेदवार मोहरा बनेका थिए । प्रचारमा स्थानीयभन्दा बाहिरी कांग्रेसी कार्यकर्ताहरुको भीड बढी रहेको बताइएको छ, जसले गाउँका स्थानीय मतदाताहरूसँग राम्रो सम्बन्ध बनाएको थिएन।
२०७९ को निर्वाचनमा कांग्रेसका जयप्रकाश गच्छदार उक्त गाउँपालिका प्रमुखमा निर्वाचित भएका थिए । गच्छदारको निधनपछि, आइतवार भएको उपनिर्वाचनमा माओवादीका नमोनारायण माझी ६,९६९ मत ल्याएर विजयी भए । कांग्रेसका वलराम सरदार थारुले ५,३३३ मत ल्याए, भने एमालेका तुलसीराम विश्वास ४,१५९ मतमा सीमित भए।
‘कोशीमा देउवा, कोइराला र सिटौला गुट पार्टीका लागि क्यान्सर नै सावित भएको छ,’ कांग्रेस सस्थापन पक्षका एक नेताले भने, ‘ यहाँ गुटका कार्यकर्ताहरु बीचको मतभेदले संगठन विस्तार समेत गुटगत रूपमा भइरहेको छ ।’
यही अवस्था रही रहेँ आगामी निर्वाचनमा त्यसको असर देखिने उनी बताउँछन् ।’यस्तो अवस्था कायमै रह्यो भने, ग्रामथानको पराजय मात्रै होइन, आगामी निर्वाचनमा तिनवटै गुटका कार्यकर्ताहरुले आ-आफ्ना उम्मेदवारको समर्थन गर्दै निर्वाचनमा उत्रिने स्थिति उत्पन्न हुन सक्छ र त्यसको नतिजाले कांग्रेसलाई अवश्य फाइदा पुग्दैन ।’
यसले कोशी कांग्रेसमा गुटगत संघर्ष पार्टीका आन्तरिक विवादलाई उजागर गर्दै, पार्टीको संगठनात्मक र चुनावी भविष्यमा थप चुनौतीहरूको संकेत गर्दैछ ।
गुटगत किचलोकै कारण, कोशी प्रदेश सरकारले सात महिना बित्दा समेत पूर्णता पाउन सकेको छैन । कांग्रेसका ८ प्रदेश सांसदको साथमा विद्रोह गरेर, एमालेको समर्थनमा गत कात्तिकदेखि वैशाखसम्म मुख्यमन्त्री बनेका कांग्रेसका केदार कार्कीलाई एमाले-माओवादी गठबन्धनले विस्थापन गरेर, एमालेका हिकमतकुमार कार्कीको नेतृत्वमा गत वैशाख २७ गते सरकार गठन गरे।
तर, कोइराला पक्षले मन्त्रीको नाम नपठाउँदा, प्रदेशको स्वास्थ्य मन्त्रालय अझै खाली रहेको छ । त्यो मन्त्रालय कांग्रेसकै भौतिक पूर्वाधार मन्त्री भूपेन्द्र राईले हेर्दै आएका छन् । प्रदेशमा ९ मन्त्रालय छन्, जसमा ५ वटा एमाले र ४ वटा कांग्रेसको भागमा छन् ।
कांग्रेसका भागमा परेका चार मन्त्रालय मध्ये कोइराला पक्षले दुईवटामा दाबी गरेको थियो, तर संस्थापन पक्षले एउटा मात्र दिएकोले कोइराला पक्ष सरकारमा सहभागी नहुँदा मन्त्रिपरिषदले पूर्णता पाउन सकेको छैन।
SHARE YOUR THOUGHTS