काठमाडौं । राजस्व चुहावटका घटना बढ्न थालेका छन् । पछिल्लो एक वर्षमा राजस्व अनुसन्धान विभागले ८ अर्ब रुपैयाँभन्दा धेरैको राजस्व चुहावटका मुद्दाहरु दर्ता गरेको छ ।
सन् २०२२ मा राजस्व अनुसन्धान विभागले ४२ वटा मुद्दा दर्ता गरेका छन् । यी मुद्दाहरुमा कुल ८ अर्ब २९ करोड ९४ लाख ८१ हजार २६१ रुपैयाँको राजस्व चुहावटका मुद्दाहरु दर्ता भएका छन् ।
दर्ता भएका मुद्दाहरुमध्ये २४ वटा मुद्दाहरुमा विगोमा शतप्रतिशत जरिवाना पनि गरिएको छ । जरिवानासहित विभागले यो वर्ष कुल राजस्व चुहावटका मुद्दाहरुबाट १४ अर्ब १३ करोड ९७ लाख २३ हजार ५३१ रुपैयाँ बराबर रकम विभागले असुलेको छ ।
विभागले राजस्व चुहावट गरेपावत आरोपितहरुलाई गरेको जरिवना नै ७ अर्ब ५८ करोड ३० लाख २१ हजार ९७० रुपैयाँ रहेको छ ।
सबैभन्दा धेरै राजस्व छल्ने कोकाकोला
विभागकाअनुसार यो वर्ष सबैभन्दा धेरै राजस्व चुवाहट गर्ने मुद्दा कोकाकोलाविरुद्ध रहेको छ । नेपालमा कोकाकोलाको आधिकारित बिक्रेता रहेको बोटलर्स नेपाल लिमिटेड विरुद्धमा विभागले राजस्व चुहावट गरेको मुद्दा गत वर्ष फाल्गुन २७ गते दर्ता गराएको थियो ।
विभागकाअनुसार कुल ३ अर्ब ७१ करोड ८९ लाख ५० हजार ४११ हजार रुपैयाँको राजस्व छुहावट पुष्टि भएसँगैको मुद्दा दर्ता गरिएको छ । विभागले कुल विगोको शतप्रतिशत जरिवानासहित ७ अर्ब ४३ करोड ६३ लाख ८ सय २२ रुपैयाँको असुल्न गर्न अदालतमा मुद्दा दर्ता गराएको थियो ।
‘अफसोर इन्डाइरेक्ट ट्रान्जेक्सन’मार्फत बोटलर्स नेपाल लिमिटेडको निहित सेयर स्वामित्वमा भएको परिवर्तनअनुसार कर दायित्व बहन नगरी बोटलर्स नेपाल लिमिटेडबाट राजस्व चुवाहट गरेको विभागले जनाएको छ ।
राजस्व चुहावट गरेको पुष्टि भएसँगै बोटलर्स नेपाल लिमिटेडमा सेयरहोल्डर रहेको संयुक्त अरब इमिरेट्सको दुबई स्थित कम्पनी कोकाकोला साउथवेस्ट होल्डिङ लिमिडेटको तर्फबाट प्रतिनिध्वि गर्ने बोर्डका सदस्यहरुविरुद्ध विभागले मुद्दा दायर गरेको थियो ।
उक्त कम्पनीका अध्यक्षसहित ८ जना निर्देशकविरुद्ध मुद्दा दायर गरिएको थियो । जसमा कम्पनीका अध्यक्ष शुक्ला वासन र निर्देशकहरु मेल्भिन तान चुन पिन, मोहम्मद अमिन घोनेइम, गौरव खोस्ला, सुदिप बजोरिया, देवब्रत मुखर्जी, सुमन्ता दत्त, जवाहर सोलाई कुप्पुस्वामी र संकेत राय रहेका छन् ।
त्यस्तै, नेपालस्थित कोकाकोलाको आधिकारिक विक्रेता रहेको बोटलर्स नेपालका कार्यकारी निर्देशकहरु प्रदीप पाण्डे, पुनित चन्द्रपाल भास्र्ने, आर्थिक प्रबन्धकहरु राजिव टण्डन, भरतबाबु दहाल, सुमित गोयाल, आर्थिक नियन्त्रक अशोक कुमार मण्डल, बोर्ड निर्देशक त्रिलोचन उप्रेती र चाटर्ड एकाउन्टेट संजिव कुमार मिश्रविरुद्ध पनि मुद्दा दायर भएको थियो ।
प्रतिबन्धित क्रिप्टोकरेन्सी र अनलाइन जुवाको कारोबारमार्फत् राजस्व चुहावट
विभागले यो वर्ष दर्ता गराएका मुद्दाहरुमा प्रतिबन्धित क्रिप्टोकरेन्सीको कारोबार गरि राजस्व चुहावट गरेका मुद्दाहरु पनि रहेका छन् ।
विभागले क्रिप्टोकरेन्सीको कारोबार गरि राजस्व चुहावट गरेको आरोपमा दुई मुद्दाहरु दर्ता गराएको छ । जसमा कुल राजस्व चुहावट ४७ करोड ३८ लाख ८१ हजार ८३ रुपैयाँको राजस्व चुहावट भएको छ । राजस्व अनुसन्धान विभागले गत वर्ष माघ १० गते र फल्गुन ३० गते गरी दुई मुद्दाहरु प्रतिबन्धित क्रिप्टोकरेन्सीको कारोबार गरेकोमा दर्ता गराएको थियो । उनीहरुविरुद्ध काठमाडौं जिल्ला अदालतमा मुद्दा दायर गरिएको थियो ।
विभागले गत वर्ष माघ १० कैलाली घर भएर काठमाडौंको कालोपुलमा बस्ने दिनेश खड्कासहित चार जनालाई प्रतिबन्धित क्रिप्टोकरेन्सीको कारोबार गरि राजस्व चुवाहट गरेको आरोपमा पक्राउ गरेको थियो । पक्राउ पर्ने आरोपितहरुमा खड्कासहित उनकी दिदी भगवती खड्का, बुबा नरवहादुर खड्का र केटी साथी खनिता धिताललाई पक्राउ गरिएको थियो ।
मोबाइल एप्स ‘ई-स्क्रील’ र ‘बिनान्स’को प्रयोग गरेर अनलाइनमार्फत अमेरिकी डलरको अवैध कारोबार गरेको आरोपमा उनीहरुलाई पक्राउ गरिएको थियो । आरोपितहरुले अनलाइनमाध्यमबाट कारोबार गरि ३७ करोड ६४ लाख ११ हजार १ सय रुपैयाँको अवैध कारोबार गरेकोमा उनीहरुबाट शो रकम विगोको रुपमा जफत गरिएको थियो ।
त्यस्तै, फाल्गुन ३० मोरङका पुस्कर श्रेष्ठ र बिनिता लिम्बुविरुद्ध पनि अनलाइनमार्फत बेटिङ गरेको तथा प्रतिबन्धित क्रिप्टोकरेन्सीको कारोबार गरेको आरोपमा काठमाडौं जिल्ला अदालतमा मुद्दा दर्ता भएको थियो । उनीहरुले वान एक्स बेट, बिनान्स, एड्भ क्यास, कोइनबेस र पेक्सफुलजस्ता मोबाइल एप्समार्फत विदेशी बिनिमय अमेरिकी डलरसम्बन्धी कसुर कार्यमा संलग्न भई अवैध रुपमा कारोबार गरेको विभागले जनाएको छ ।
उनीहरुबाट कुल विगो रकम ९ करोड ७४ लाख ६९ हजार ९ सय ८३ रुपैयाँको अवैध कारोबार गरेको पुष्टि भएपछि शो रकम विगोको रुपमा जफत गरिएको थियो ।
यी हुन् धेरै राजस्व चुहावटका मुद्दा
विभागले २०२२ मा दर्ता गराएका राजस्व चुवाहट मुद्दाहरुमा अर्बौं रकमसम्मका मुद्दाहरु रहेका छन् ।
विभागले गत वर्ष पुस २० गते उच्च अदालत पटनमा काठमाडौंको नागार्जुन नगरपालिकामा रहेको आनसान इन्टरनेसनल प्रालिका सञ्चालक शोभाकान्त ढकाल, सरोज ढकाल, उमा कुमारी ढकाल र सान्टु ढकाल तथा सो कम्पनीको लेखापरिक्षण गर्ने फर्म ललितपुरको ललितपुर महानगरपालिकामा रहेको राजेश्वर एण्ड कम्पनीका लेखा परिक्षक तथा प्रोपराइटर राजेश्वर श्रेष्ठ विरुद्ध १ अर्बभन्दा धेरैको राजस्व चुहावटको मुद्दा दायर गराएको थियो ।
आरोपितहरुले राजस्व चुहावट गर्ने मनसायले जालसाजीयुक्त, नक्कली र झुट्टा मूल्यका अभिवृद्धि कर विवरण, वित्तिय विवरण तथा आय विवरणहरु तयार गरी कारोबार नै नभएको देखाएर कर नतिरि राजस्व चुहावट गरेको विभागले जनाएको छ ।
आरोपितहरुको कुल विगो १ अर्ब २० करोड ४९ लाख १७ हजार ८२४ रुपैयाँ रहेको छ । जसमा विभागले अदालतलाई सम्पूर्ण विगो जफत गर्न र विगोको शतप्रतिबत नै जरिवाना गर्न मागदावी गर्दै मुद्दा दर्ता गराएको थियो ।
त्यस्तै, उच्च अदालत पाटनमा गत वर्ष चैत २ मा दिपक कुमार देउजासहित अन्य दुई जनाविरुद्ध ८ करोड २१ लाख ७२ हजार ६४१ रुपैयाँ राजस्व चुहावटको मुुद्दा दायर भएको थियो । उक्त मुद्दा देउजासहित मोहन प्रसाद भट्टराई र सुनिलमान शाक्यविरुद्ध दर्ता गरिएको थियो।
उनीहरुविरुद्ध राजस्व चुहावट गर्ने मनसायले जालसाजीयुक्त, नक्कली तथा झुट्टा मूल्य अभिबृद्धि बिल बनाएको र ऐन तथा नियमअनुसार तिर्नुपर्ने कर नतिरि राजस्व चुहावट गरेको आरोपमा मुद्दा दायर गरिएको थियो । विभागले तीन जनाविरुद्ध ८ करोड २१ लाख ७२ हजार ६४१ विगोसहित शतप्रतिशत जरिवाना गर्दै अदालतलाई १६ करोड ४३ लाख ४५ हजार २८२ असुल्न पत्राचार गरेको थियो ।
गत बैशाख ११ मा विभागले उच्च अदालत पाटनमै १८ करोड ५ लाख ६८ हजार ६४३ रुपैयाँ विगोसहित शतप्रतिशत जरिवना गर्नभन्दै मुद्दा दर्ता गराएको थियो । उक्त मुद्दा काठमाडौंको शुभलक्ष्मी इन्टरनेसनलका मनिष कुमार अग्रवालसहित हितेश कुमार अग्रवाल, प्रमित महर्जन, बिमल अग्रवाल र दिपेन्द्र कुमार अग्रवाल विरुद्ध मुद्दा दर्ता गरिएको थियो । उनीहरुविरुद्ध नक्कली र झुट्टा मूल्य अभिबृद्धि कर बिल खरिद गरि आर्थिक विवरण तथा आय विवरणहरु तयार गरी कानुनअनुसार कर नतिरेको मुद्दा अदालतमा दर्ता गरिएको थियो ।
विभागले गत मंसिर १५ मा उच्च अदालत पाटनमा नवराज शर्मा भनिने छविलाल अगस्तीविरुद्ध २ करोड १६ लाख ९ हजार ५१६ रुपैयाँ विगोसहितको मुद्दा दर्ता गरेको थियो । विभागले पर्साको सखुवा पर्सौनी गाउँपालिकाका अगस्तीवरुद्ध बिल बिजक तथा भन्सार प्रज्ञापन पत्रलगायत नभएको विदेशी ब्राण्डका चुरोट, गुट्खालगायतका बस्तु नेपाल ल्याएर बिक्री गर्दै राजस्व चुहावट गरेको आरोपमा मुद्दा दायर गराएको थियो ।
शर्माविरुद्ध बिगोको शतप्रतिशत जरिवानासहित ४ करा्ड ३२ लाख १९ हजार ३२ रुपैयाँ असूल गर्न भन्दै अदालतमा मुद्दा दर्ता गराएको थियो ।
उच्च अदालत पाटनमै विभागले कात्तिक २८ मा प्रविण कुमार महतो र आत्मराम पासवानविरुद्ध मुद्दा दायर गरिएको थियो । उनीहरुविरुद्ध सम्बन्धित व्यक्तिको कम्पनी अंकुश सप्लायर्स एन्ड ट्रेडर्स तथा युनिक ट्रेडर्स एन्ड इन्टरप्राइजेजमार्फत झुट्टा तथा नक्कली मूल्य अभिबृद्धि करको बिल खरिद गर्दै वित्तिय विवरण तयार गरेर राजस्व चुहावट गरेको आरोपमा मुद्दा दायर गरिएको थियो ।
सम्बन्धीत महतो र पासवानविरुद्ध बिगोको शतप्रतिशत जरिवानासहित ४५ करोड २७ लाख ६२ हजार ४६ रुपैयाँ असुल गर्नभन्दै अदालतमा मुद्दा दायर गरिएको थियो ।
प्रतिक्रिया