कुन बैंकबाट ऋण लिनु भएको छ,यी बैंकको बेसरेट घट्यो ब्याजदर घटाउन भन्नुहोस्

काठमाडौं । वाणिज्य बैंकहरुको असोज मसान्तको अपरिस्कृत वित्तीय विवरण सार्वजनिक भइसकेको छ ।

सरकारी लगानीको राष्ट्रिय वाणिज्य बैंकले मात्र आफ्नो विवरण सार्वजनिक गरेको छैन । प्रकाशित भएको विवरण अनुसार बैंकहरुलाई ऋण दिनको लागि चाहिने रकमको भने ठूलो अभाव भएको देखिएको छ ।

विवरणले धेरै बैंकको असार मसान्तको तुलनामा असोज मसान्तमा कर्जाको न्यूनतम आधार दर(बेसरेट) भने घटेको देखिएको छ । तर,असार मसान्तमा नै बेसरेट कम भएका वाणिज्य बैंकहरु नबिल,स्टाण्डर्ट चाटर्डजस्ता बैंकको आधार दर बढेको छ ।

यो पटक सबैभन्दा बढी बेसरेट प्रभु बैंकको घटेको छ । असार मसान्तमा १०.६२ प्रतिशत रहेको प्रभुको बेसरेट असोज मसान्तमा ९.५ प्रतिशतमा घटेको छ ।

यो पटक बेसरेट घटेपनि उपभोक्तालाई भने ठूलो लाभ छैन । मुख्य गरेर ऋण दिन नसक्ने अवस्थामा सबैजसो बैंक पुगेको हुनाले घटेको बेसरेटको लाभ ऋणीले उठाउन पाउने छैनन् ।

पहिलेजस्तै यो पटक पनि सबैभन्दा कम बेसरेट पूर्ण सरकारी लगानीको राष्ट्रिय वाणिज्य बैंकको नै । वाणिज्य बैंकको बेसरेट ६.२ प्रतिशत छ । यसपछि नेपाल बैंकको बेसरेट ७.५ प्रतिशत छ ।

असारभन्दा बेसरेट बढेपनि कम हुनेमा नबिल तेस्रो स्थानमा रहेको छ । नबिलको बेसरेट ८.०६ प्रतिशत छ । स्टाण्डर्ट चाटर्डको बेसरेट ८.१ प्रतिशतको छ ।
सबैभन्दा बढी बेसरेट कृषि विकास बैंकको १२.३२ प्रतिशत छ ।