सर्बोच्चको आदेशसँगै गोर्खा ब्रुअरीलाई ८७ करोड कर निर्धारण

सर्बोच्च अदालतको आदेशसँगै गोर्खा ब्रुअरीलाई ८७ करोड रुपैयाँ कर निर्धारण भएको छ ।

आन्तरिक राजस्व कार्यालय भरतपुरले गोर्खा ब्रुअरीलाई आर्थिक वर्ष २०७३/७४ र २०७४/७५ मा जर्ती वापतको ८७ करोड रुपैयाँ कर निर्धारण गरेको जनाएको छ ।

आन्तरिक राजस्व कार्यालय भरतपुरले गोर्खा ब्रुअरीलाई जेठ ९ गते नियम विपरित बढी जर्ती कट्टा गरेको भन्दै कर किन नलगाउने भन्दै पत्र लेखेको थियो । त्यसको विरोधमा गोर्खा ब्रुअरीले उच्च अदालत पोखरामा मुद्दा दर्ता गरेको थियो ।

गोर्खा ब्रुअरीले डेढ अर्ब रुपैयाँ कर छल्यो, कर नतिर्न फरक-फरक अदालतमा मुद्दा

उच्च अदालत पोखराले गोर्खा ब्रुअरीको कर निर्धारण प्रक्रिया रोक्न अन्तरिम आदेश दिएको थियो । उच्च अदालतको अन्तरिम आदेशपछि कर कार्यालय सर्बोच्च अदालत गएको थियो । सर्बोच्च अदालतका प्रधानन्यायधीश चोलेन्द्र शमशेर राणाको एकल इजलाशले उच्च अदालत पोखराले नियम विपरित अन्तरिम आदेश दिएको भन्दै सो आदेश खारेज गर्दै आदेश दिने उच्च अदालतका पोखराका तीनजना न्यायधीशलाई कारवाही गर्ने फैसला सुनाएको थियो ।

कर कार्यालयले गोर्खा ब्रुअरीलाई शुक्रबार नै कर सरकारी कोषमा दाखिला गर्नको लागि पत्र काटेको थियो ।

‘सर्बोच्चको अन्तरिम आदेशसँगै नियम अनुसार राज्यको कोषमा कर दाखिला गर्नको लागि पत्राचार गरेका छौ,’कार्यालय स्रोतले भन्यो ।

गोर्खा ब्रुअरीलाई कर निर्धारणमा चित्त नबुझेमा आन्तरिक राजस्व विभागका महानिर्देशक समक्ष प्रशासयिक पुनरावोकनको लागि निवेदन दिन सक्ने कानूनी अधिकार छ ।

गोर्खा ब्रुअरीको मुद्दामा कर कार्यालयको पक्षमा सर्बोच्च अदालत गरेको फैसलाले कर निर्धारण रोक्न सिधै सर्बोच्च अदालत जाने प्रवृति रोकिने अपेक्षा कर अधिकारीको छ ।
अहिले कर निर्धारण विरुद्द करदाताहरु सिधै उच्च तथा सर्बोच्च अदालतमा जाने प्रवृति छ ।