८ बैंकको दोस्रो त्रैमासको विवरण सार्वजनिक, नाफा ७.२२ प्रतिशतले बढ्यो

काठमाडौं । अहिलेसम्म आठ वटा वाणिज्य बैंकहरुले चालु आर्थिक बर्षको दोस्रो त्रैमासको वित्तीय विवरण सार्वजनिक गरेका छन् ।

अहिलेसम्म आठ वटा बैंकले सार्वजनिक गरेको दोस्रो त्रैमासको वित्तीय विवरण अनुसार ७.२२ प्रतिशतले नाफा बढेको छ ।

बैंकहरुले गत आवको दोस्रो त्रैमासमा ८ अर्ब ९४ करोड १२ लाख ९२ हजार ७२९ रुपैयाँ नाफा आर्जन गरेका थिए । चालु आवको दोस्रो त्रैमासमा बैंकहरुको नाफा ७.२२ प्रतिशतले बढेर ९ अर्ब ५८ करोड ७५ लाख ८४ हजार ५३७ रुपैयाँ नाफा आर्जन गरेका छन् ।

गतवर्ष संचालनमा रहेका २८ वटा वाणिज्य बैंकमध्ये जनता बैंक ग्लोबल आईएमईमा मर्ज भइसकेको छ । अहिले सञ्चालनमा २७ वटा बैंक रहेका छन् । २७ मध्ये ८ वटाको दोस्रो त्रैमासको रिपोर्ट आएको हो । ८ वटा बैंक मध्ये ३ वटा बैंकको नाफामा गिरावट देखिएको छ ।

सबैभन्दब बढी नेपाल बैंकको नाफामा १८.६० प्रतिशतको गिरावट देखिएको छ । गत आवको दोस्रो त्रैमासमा १ अर्ब ६६ करोड १४ लाख ९८ हजार २०२ रुपैयाँ नाफा आर्जन गरेको बैंकको चालु आवको सोही अवधिमा पुग्दा १ अर्ब ३५ करोड २३ लाख ९६ हजार ८६३ रुपैयाँ मात्रै नाफा भएको छ ।

यस्तै सिटिजन्स बैंकको पनि नाफामा १०.७२ प्रतिशतको गिरावट देखिएको छ । गत आवको दोस्रो त्रैमासमा ७७ करोड ३ लाख ४५ ९२१ रुपैयाँ नाफा आर्जन गरेको बैंकको चालु आवको सोही अवधिमा आईपुग्दा १०.७२ प्रतिशतले घटेर ६८ करोड ७७ लाख १ हजार ४९ रुपैयाँ मात्रै आर्जन गरेको छ ।

यस्तै सिद्धार्थ बैंकको पनि नाफा ४.०१ प्रतिशतले घटेको छ । गत आवको दोस्रो त्रैमासमा १ अर्ब ६ करोड ९४ लाख ४३ हजार ६१३ रुपैयाँ नाफा आर्जन गरेकोमा चालु आवको सोही अवधिमा आईपुग्दा १ अर्ब २ करोड ६५ लाख ४९ हजार ४७८ रुपैयाँ मात्रै नाफा आर्जन गरुेको छ ।

यो अवधिमा ५ वटा बैंकका नाफा बढेको छ । सबैभन्दा बढी एनआईसी एसिया बैंकको नाफा ३३.३९ प्रतिशतले बढेर २ अर्ब १ करोड ६२ लाख २५ हजार ६२१ रुपैयाँ पुगेको छ । गत आवको सोही अवधिमा १ अर्ब ५१ करोड १४ लाख ५८ हजार ६८६ रुपैयाँ रहेको छ र ८ वटा बैंकमा सबैभन्दा एनआईसी बैंकले नै कमाएको छ । अन्य बैंकको नाफा त्यो भन्दा कम रहेको छ । यो अवधिमा अर्ब भन्दा बढी नाफा कमाउने ५ वटा बैंक रहेका छन् ।
अर्बपति क्लबमा प्रवेश गर्ने बैंकमा सिदार्थ, सानिमा, एनआईसी बैंक, एभरेष्ट बैंक र नेपाल बैंक रहेका छन् ।