भन्सार विभागको महानिर्देशकको जिम्मेवारी पौडेललाई

काठमाडौं । अर्थमन्त्री प्रकाशशरण महतले बजेट सार्वजनिक गरे लगत्तै भन्सार विभागका महानिर्देशकको जिम्मेवारी शोभाकान्त पौडेललाई दिएका छन् ।

वैशाख अन्तिम सातामात्र भन्सार विभागका महानिर्देशक चक्रबहादुर बुढाको संस्कृति, पर्यटन तथा नागरिक उड्डयन मन्त्रालयमा सरुवा भएको थियो ।

मन्त्री महतले बजेट लगत्तै खानेपानी मन्त्रालयबाट पौडेललाई भित्र्याउँदै भन्सार विभागको जिम्मेवारी दिएका हुन् ।

यसअघि पौडेल आन्तरिक राजस्व विभागका पनि महानिर्देशक थिए । तत्कालीन अर्थमन्त्री जनार्दन शर्मासँग खटपट भएपछि पौडेललाई विभागको महानिर्देशकबाट हटाइएको थियो ।
पौडेलले ठूला करदाता कार्यालयका प्रमुख भएर पनि काम गरेका छन् । उनी राजस्व समूहका अधिकृत हुन् ।