काठमाडौं । पछिल्लो समय नेपाली खेलाडीहरुले खेल खेलेरै जीवनयापन गर्न सक्ने अवस्था बन्दै गएको छ । अहिले चर्चामा रहेका क्रिकेट खेलाडीले राम्रै कमाइ गरिरहँदा कुनै समयमा चर्चामा रहेको नेपाली फुटबल खेलाडीको अवस्थामा भने खासै सुधार हुन नसकेको हो ।
नेपाली राष्ट्रिय फुटबल टोलीका खेलाडीहरुले पारिश्रमिक पाउन थालेको २०५२ सालदेखि हो ।
अखिल नेपाल फुटबल संघ (एन्फा)मा गणेश थापाको नेतृत्वले पहिलो पटक नेपाली खेलाडीलाई तलब दिन सुरु गरेको थियो । पहिलो पटक नेपाली फुटबल खेलाडीले १५ सय रुपैयाँ तलब पाएका थिए ।
फुटबल खेलाडीको रुपमा त्यसपछि ५, ७, १५, १८ हजार हुँदै अहिले ३० हजारसम्म पुगेको छ । गणेश थापाले बैंकमा ८ करोड रुपैयाँको फिक्स डिपोजिट राखेर खेलाडीलाई तलब दिने गरेका थिए ।
त्यसबाहेक उनले आन्तरिक स्रोत जुटाएर नेपाली खेलाडीलाई पुरस्कार, उपहार दिने पनि गरेका थिए ।
अहिले राष्ट्रिय टोलीमा पर्ने पुरुष र महिलातर्फ ३०/३० जना फुटबल खेलाडीले मासिक ३० हजार रुपैयाँ तलब पाउँछन् । गत भदौमा बसेको एन्फा कार्यसमिति बैठकले खेलाडीले पाउने मासिक तलब बढाउने निर्णय गरेको थियो ।
खेलाडीको तलब बढाएकै बैठकले एन्फा महासचिवको तलब बढाएको थियो ।
बैठकमा महसचिवको तलब २ हजार अमेरिकी डलर अर्थात करिब २ लाख ७२ हजार रूपैयाँ पुर्याउने प्रस्ताव भएको थियो ।
केही सदस्यले खेलाडीको सीमितरुपमा तलब बढे पनि महासचिवको धेरै बढ्ने प्रस्ताव आएको भन्दै असन्तुष्टी जनाएका भए पनि प्रस्ताव बहुमतले पारित भएको थियो । यो तलब बढ्नुअघि महासचिव किरण राईले १ लाख २० हजार मासिक तलब लिने गर्थे ।
नेपाली राष्ट्रिय फुटबल टोली अहिले फिफ वरीयताको १७५ औं स्थानमा छ । पछिल्लो दुई वर्षसम्म लिग नहुँदा प्रतियोगितामा नेपाली खेलाडीले उत्कृष्ट प्रदर्शन गर्न सकेका छैनन् भने उनीहरुको कमाइ बढ्न सकेको छैन । फिफा विश्वकप छनोटको पछिल्लो चार खेलमा पनि नेपालले जित निकाल्न सकेको छैन ।
अहिले राष्ट्रिय क्रिकेट टोलीका सदस्यले पनि मासिक रुपमा तलब पाउँदै आएका छन् ।
क्रिकेटरलाई १ लाख तलब
फुटबल खेलाडीलाई सबैलाई मासिक रुपमा ३० हजार रुपैयाँ उपब्ध गराइने गरिएको भए पनि नेपाल क्रिकेट संघले राष्ट्रिय टोलीका सदस्यलाई विभिन्न श्रेणीमा वर्गीकरण गर्दै मासिक तलब उपलब्ध गराउँदै आएको छ ।
यसअघि क्रिकेट संघले सन् २०२४ का लागि खेलाडीहरुको वर्गीकरण गरेको छ ।
संघले पुरुष क्रिकेट खेलाडी तर्फ ३० जना र महिलातर्फ १९ जना खेलाडीलाई ४ समूहमा वर्गीकरण गरेको छ ।
पुरुषतर्फ ३१ जना वर्गीकरणमा परेका खेलाडी
ग्रेड ‘ए’- रोहित पौडेल, सोमपाल कामी, सन्दीप लामिछाने, करण के.सी., दिपेन्द्र सिंह ऐरी, आसिफ सेख र कुशल भुर्तेल
ग्रेड ‘बी’- कुशल मल्ल, गुलशन झा, भिम सार्की, ललित नारायण राजवंशी, आरिफ सेख र अविनाश बोहरा
ग्रेड ‘सी’ – बिनोद भण्डारी, अर्जुन साउद, सन्दिप जोरा र प्रतिस जी. सी.
ग्रेड ‘डी’ – पवन सर्राफ, सागर ढकाल, अनिल साह, बिबेक कुमार यादव, आकास चन्द, बसिर अहमद र सुर्य तामाङ
इमर्जिङ क्याटेगरी – दिपेश कंडेल (कोशी), रुपेस सिंह (मधेश), रिजन ढकाल (बागमती), बिपिन खत्री (गण्डकी), देब खनाल (लुम्बिनी), अर्जुन घर्ती (कर्णाली) र हेमन्त धामी (सुदुर पश्चिम) ।
क्यानले ग्रेड ‘ए’ मा परेका खेलाडीलाई १ लाख, ग्रेड ‘बी’ लाई ७० हजार, ग्रेड ‘सी’ लाई ५५ हजार, ग्रेड ‘डी’ लाई ३५ हजार र इमर्जिङ क्याटोगरिलाई २५ हजार मासिक तलब उपलब्ध गराउने गरेको छ ।
त्यस्तै महिला क्रिकेटरतर्फ १९ जना समावेश भएका छन् । जसमा
ग्रेड ‘ए’ – इन्दु बर्मा, रुबिना क्षेत्री, सीता राना मगर
ग्रेड ‘बी’ – कविता कुँवर
ग्रेड ‘सी’ – पुजा महतो, अश्मिना कर्माचार्य
ग्रेड ‘डी’ – अप्सरी बेगम, कविता जोशी, संगिता राई, काजोल श्रेष्ठ र बिन्दु रावल
इमर्जिङ क्याटोगरि- सोनी पाख्रिन, खुसि डंगोल, ज्योत्सनिका मरासिनी, कन्चन श्रेष्ठ, रुबि पोदार, सृस्टि जैसी, सम्झना कुमारी खड्का, सना प्रविन रहेका छन् ।
महिलातर्फ ग्रेड ‘ए’ लाई ५० हजार, ग्रेड ‘बी’ लाई ३५ हजार, ग्रेड ‘सी’ लाई ३० हजार, ग्रेड ‘डी’ लाई २५ हजार र इमर्जिङ क्याटोगरिलाई २० हजार मासिक तलब उपलब्ध गराउने समेत निर्णय भएको क्यानले जनाएको छ ।
प्रतिक्रिया