पहिलो त्रैमासमा बैंकहरुको नाफा १६ अर्ब १७ करोड, तीन बैंक ३ महिनामा अर्बपति

काठमाडौं । सञ्चालनमा रहेको २८ वटा बाणिज्य बैंकको नाफा चालु आर्थिक वर्षको पहिलो त्रैमासमा ६.२५ प्रतिशत नाफा बढाएका छन् ।

गत आवको पहिलो त्रैमासमा १५ अर्ब २२ करोड ३६ लाख ६६ हजार २५२ रुपैयाँ नाफा आर्जन गरेका बैंकहरुले चालु आवको सोहि अवधिमा आउँदा आफ्नो नाफालाई बढाएर १६ अर्ब १७ करोड ६४ लाख ६४ हजार १६० रुपैयाँ नाफा आर्जन गरेका छन् ।

यो आवको पहिलो त्रैमासमा सबैभन्दा बढी नाफा कमाउने बैंकमा सरकारी स्वामित्वको राष्ट्रिय बाणिज्य बैंक रहेको छ । बाणिज्य बैंकले यो अवधिमा १ अर्ब १२ करोड ७५ लाख ३७ हजार १४४ रुपैयाँ नाफा आर्जन गरेको छ । बैंकको नाफा गत आवको सोहि आवधिको तुलनामा ०.७५ प्रतिशतले बढी हो ।

बाणिज्य बैंकलाई पछ्याउनेमा नबिल बैंक रहेको छ । नबिल बैंकले बाणिज्यको भन्दा कम अर्थात १ अर्ब १२ करोड ३५ लाख ८७ हजार रुपैयाँ नाफा आर्जन गरेको छ । नबिल बैंकको नाफा गत आवको भन्दा ६.७५ प्रतिशतले बढेको छ । बढी नाफा कमाउने बैंकको तेस्रो नम्बरमा एनआईसी एसिया बैंक रहेको छ । यो बैंकको नाफा १ अर्ब ९६ लाख ५ हजार २२९ रुपैयाँ रहेको छ ।

जुन नाफा गत आवको भन्दा ३४.१३ प्रतिशतले बढी हो । चालु आवको पहिलो त्रैमासको रिपोर्ट अनुसार नाफा आर्जनमा अर्बपति समूहमा यि नै तीन वटा बैंक, राष्ट्रिय बाणिज्य, नबिल र एनआईसि एसिया रहेका छन् । सबैभन्दा कम नाफा आर्जन गर्ने बैंकमा सिभिल बैंक रहेको छ । सिभिल बैंकले जम्मा १५ करोड ८९ लाख ५० हजार रुपैयाँ मात्रै नाफा आर्जन गरेको छ ।

८ वटा बैंकको नाफा घट्यो

असोज मसान्तसम्ममा ८ वटा बैंकको नाफामा गिरावट आएको छ । सञ्चालनमा रहेका २८ वटा बाणिज्य बैंकमध्ये २० वटा बैंकले नाफा आर्जन गरेका छन भने ८ वटा बैंकको नाफा घटेको छ । प्रतिशतको आधारमा हेर्दा सबै भन्दा बढी नाफा नेपाल बैंकको ३६.३३ प्रतिशतले घटेको छ । एनसीसी बैंकको २० प्रतिशतले घटदा इन्भेष्टमेन्टको १९ प्रतिशतले नाफा घटेको छ । नाफा घटनेमा नेपाल एसबीआई, बैंक अफ काठमाण्डू, सिभिल सिटिजन्स, सिद्धार्थ बैंक रहेका छन् ।