सम्पत्ति शुद्धीकरणको अभियोगमा ८ जनाविरुद्ध ५ अर्ब ३४ करोड बिगो माग गर्दै मुद्दा

काठमाडौं । चालु आर्थिक वर्षको फागुनसम्म सम्पत्ति शुद्धिकरणसम्बन्धी ५१ उजुरी कारबाही प्रक्रियामा अघि बढेको छ ।

आइतबार संघीय संसदमा अर्थमन्त्री डा प्रकाशशरण महतले पेस गरेको आर्थिक सर्वेक्षणकाअनुसार चालु आवको फागुनसम्म सम्पत्ति शुद्धीकरण तथा आतंकवादी क्रियाकलापमा वित्तीय लगानी सम्बन्धी ४८९ उजुरी दर्ता भएका थिए ।

जसमध्ये ५१ उजुरीलाई आवश्यक कारबाहीका लागि सम्बन्धित निकायमा पठाइएको आर्थिक सर्वेक्षणमा उल्लेख गरिएको छ ।

यो अवधिमा ५ अर्ब ३४ करोड ८८ लाख बिगो कायम गरी विशेष अदालतमा ८ मुद्दा दायर भएको आर्थिक सर्वेक्षणमा उल्लेख छ।

सवेक्षणकाअनुसार चालु आवको फाल्गुनसम्म वित्तीय जानकारी इकाईमा ३१ सय ७० वटा शंकास्पद कारोबार प्रतिवेदन प्राप्त भएको र त्यसमध्ये ५ सय २९ प्रतिवेदनको विश्लेषण भएको छ ।

यीमध्ये २९९ प्रतिवेदनको अभिलेखिकरण गरिएको र २३० प्रतिवेदन अनुसन्धान तथा अनुगमनका लागि अनुसन्धानकारी तथा नियामक निकायमा पठाईएको सर्वेक्षणमा उल्लेख छ ।

सर्वेक्षणकाअनुसार हाल नेपालमा एसिया–प्यासिफिक समूह (एपिजी) र फाइनेन्सियल एक्सन टास्क फोर्स (एफएटिएफ)को मापदण्डअनुसार वित्तीय अपराध र गैरकानुनी कारोकार निगरानीमार्फत वित्तिय सुशासन कायम गर्ने सिलसिलामा परास्परीक मूल्यांकन भइरहेको छ ।