रविलाई बुटवल लैजान विमानस्थल लगियो, मौसम प्रतिकुल हुँदा भएन उडान

पोखरा। सहकारी ठगी प्रकरणमा कास्की प्रहरीको हिरासतमा रहेका राष्ट्रिय स्वतन्त्र पार्टीका सभापति रवि लामिछानेलाई बुटवल लैजाने तयारी गरिएको छ ।

लामिछानेलाई भैरहवा लैजानका लागि कास्की प्रहरीले उनलाई पोखरा विमानस्थल पुर्‍याएको छ । तर प्रतिकुल मौसमका कारण उडान भने हुन सकेको छैन ।

बुध्द एयरको बिहान सात बजेको उडानबाट लामिछानेलाई भैरहवा विमानस्थल लैजाने कार्यक्रम थियो । त्यसका लागि लामिछानेलाई विमानस्थलमा लगिसकिएको छ । विमानस्थलको मौसम प्रतिकुल रहेको र कुहिरो लागेकाले उडान ढिला भएको कास्की प्रहरी प्रमुख श्यामबाबु ओलियाले जानकारी दिए ।

बुटवलमा रहेको सुप्रिम बचत तथा ऋण सहकारी संस्थाको बचतकर्ताको बचत रकम तथा ऋण हिनामिना गरेको आरोपमा किटानी जाहेरी परेपछि प्रहरीले लामिछानेलाई पक्राउका लागि अदालतबाट अनुमति लिएको थियो । कात्तिक ८ गते रुपन्देही जिल्ला अदालतले लामिछानेसहितका आरोपीलाई पक्राउका लागि पुर्जी जारी गरेको थियो ।

गोर्खा मिडिया नेटवर्क प्रालिका तत्कालीन प्रबन्ध निर्देशक रवि लामिछानेसहित उपाध्यक्ष छविलाल बञ्जाडे जोशी लगायतलाई पक्राउ गर्न जिल्ला अदालतका न्यायाधीश श्यामप्रसाद श्रेष्ठको इजलासले अनुमति दिएको थियो ।

बुटवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैयाँ गोर्खा मिडिया नेटवर्क प्रालिमा गएको र त्यसको खर्च लामिछानेको हस्ताक्षरमा भएको भन्दै त्यसको अनुसन्धान गर्न लामिछाने, जीवी राईसहित १२ जनालाई पक्राउ गर्न रुपन्देही जिल्ला अदालतले अनुमति दिएको थियो ।

बुटवलस्थित सुप्रिम सहकारीबाट एक करोड ९६ लाख रवि लामिछानेकै नाममा, जोशीका नाममा २ करोड ५० लाख रुपैयाँ र साढे १२ करोड विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समितिको प्रतिवेदनमा उल्लेख छ ।

छविलाई यसअघि नै रुपन्देही लगेर १३ घण्टा बयान लिँदै पोखरा पठाइएको थियो भने रविलाई रुपन्देही ल्याउने तयारी भइरहेको प्रहरी स्रोतको भनाइ छ ।

कात्तिक २ देखि हिरासतमा रवि

कात्तिक २ गते काठमाडौंस्थित पार्टी कार्यालयबाट पक्राउ परेका पूर्वउपप्रधान एवं गृहमन्त्री रवि लामिछाने त्यसयता कास्की प्रहरीको हिरासतमा छन् ।

पोखराको सूर्यदर्शन सहकारीको रकम अपचलनमा लामिछाने कास्की प्रहरीको हिरासतमा रहेका हुन् । उनी २५ दिनयता कास्की प्रहरीको हिरासतमा रहेका छन् ।

आइतबार मात्र कास्की जिल्ला अदालतले लामिछानेलाई थप १३ दिन हिरासतमा राख्न अनुमति दिएको छ । कास्कीमा सूर्यदर्शन सहकारी ठगी प्रकरणमा अनुसन्धान भइरहँदा लामिछानेलाई रुपन्देही लैजाने प्रहरीले तयारी गरेको हो।

जिल्ला प्रहरी कार्यालय रुपन्देहीका प्रहरी प्रमुख एसपी रन्जितसिंह राठौरले लामिछानेलाई रुपन्देही ल्याउने तयारी भइरहेको बताए ।

लामिछानेलाई आज बिहान पोखराबाट भैरहवा ल्याउन लागिएको हो । रास्वपा नेतृ ज्वाला संग्रौलाले लामिछानेलाई विहान ७ बजेअघि नै पोखरा विमानस्थलमा लगिएको भए पनि बाक्लो हुस्सुका कारण उडान हुन नसकेको बताइन् ।

लामिछानेलाई बुटवल ल्याउने भएसँगै रास्वपाले बुटवल केन्द्रित आन्दोलन गर्ने भएको छ ।

मंगलबार(आज) विहान साढे ११ बजे लुम्बिनी गेट भैरहवामा रास्वपाले ऐक्यबद्धताका लागि उपस्थित हुन आग्रह गरेको छ ।